香港小姐卸任感言

香港小姐卸任感言，是每届行将卸任的上届香港小姐冠军于颁奖予下届香港小姐冠军（2008香港小姐冠军张舒雅除外）前所说出的一段话。

1985年度冠军：谢宁

• 宣读日期：1986年06月01日，香港演艺学院
  • 过去嘅一年，系我人生历程中最多姿多彩，最值得我永远怀念嘅一年，响履行香港小姐任务期间，我曾经代表香港参加美国迈阿美举行嘅环球小姐竞选，肩负起亲善睦邻嘅使命，响本港，亦曾经参与好多社会公益活动，呢啲难得嘅经历，将会响我心里，永远留下一页美丽嘅回忆，过去一年内，我好高兴有机会参与幕前演出，包括剧集、司仪及歌舞表演，学到好多新知识，丰富我嘅人生。稍后，我就会将香港小姐嘅责任移交比继任嘅佳丽，我衷心祝福佢响任内期间有更大嘅成就。最后，我借呢个机会响一年内不断鼓励我嘅朋友致万分嘅谢意。

1986年度冠军：李美珊

• 宣读日期：1987年08月09日，香港演艺学院
  • 当选为1986年度嘅香港小姐，对我嚟讲可以话系人生嘅转捩点，系过去一年里面，我曾经远赴巴拿马参加环球小姐竞选，认识咗好多来自唔同国家嘅佳丽，而我因为接触过多国语言，所以能够同佢地作深入嘅沟通，履行亲善大使嘅任务，亦得到咗好多份珍贵嘅友谊，系我在任期间，经常参与社会公益活动。

1987年度冠军：杨宝玲

• 宣读日期：1988年08月21日，香港演艺学院
  • 过去嘅呢一年，系我人生历程中最多姿多彩而又最值得我永远怀念，喺履行香港小姐任务期间，我曾经代表过香港参加世界小姐竞选，得到“亚洲皇后”呢个奖项，参加环球小姐竞选嘅时候，我得到第五名，能够屡次为香港人争光，呢份荣誉我将会永远难忘，稍后，我就会将香港小姐嘅任务移交比即将诞生嘅1988年度香港小姐，系呢一度，我衷心咁祝福佢喺任内有更出色嘅表现，将香港人嘅友谊带到世界每一处，最后，我借呢个机会向喺过去呢一年里面不断咁支持我，不断咁鼓励我嘅朋友，致万二分嘅谢意，我衷心咁多谢你地。

1988年度冠军：李嘉欣

• 宣读日期：1989年08月20日，香港文化中心
  • 响过去嘅一年，我履行咗香港小姐同国际亲善小姐嘅任务，代表香港参加多个国际性选美盛会，并且多次前赴海外，肩负起推广香港旅游同贸易嘅使命，籍住交流活动嘅机会，可以分享到国际友谊，呢啲咁有意义嘅任务，充实咗我人生宝贵嘅经验，今晚新嘅香港小姐即将诞生，我衷心祝福佢继续发扬香港小姐任务，将香港呢个大都会嘅国际地位更加提升，同埋有更璀璨嘅成就。

1989年度冠军：陈法蓉

• 宣读日期：1990年08月18日，香港文化中心
  • 响过去嘅一年，我履行咗香港小姐同埋国际亲善小姐嘅任务，代表香港参加过环球小姐，同埋国际华裔小姐嘅竞选，并且多次前往海外肩负起推广香港旅游业同埋贸易嘅使命，籍住呢啲交流嘅机会，分享国际友谊，提升香港嘅地位，呢啲咁有意义嘅任务，充实咗我生命宝贵嘅经验。
  • 九十年代第一位香港小姐今晚就会诞生，我喺呢度衷心咁祝福呢位九零新女性，继续发扬香港小姐嘅精神，与全港市民齐心共创香港新里程。

1990年度冠军：袁咏仪

• 宣读日期：1991年06月23日，红磡香港体育馆
  • 系过去嘅一年，我履行咗香港小姐嘅任务，代表香港参加咗国际华裔小姐竞选同埋环球小姐竞选，并多次前往海外肩负起推广香港嘅使命，揭尽年力为香港作出咗一点贡献，同时我亦参加情景喜剧“我爱玫瑰园”嘅演出，呢啲咁有意义嘅任务，充实咗我人生宝贵嘅经验，今晚新嘅香港小姐即将诞生，我衷心祝福佢继续发扬香港小姐嘅任务，将香港响国际地位更加提高，同埋佢个人有更璀璨嘅成就。

1991年度冠军：郭蔼明

• 宣读日期：1992年06月07日，红磡香港体育馆
  • 系过去一年，我曾经以亲善大使嘅身份，代表香港参加好多海外嘅国际性盛会，籍着呢啲亲善交流活动，宣扬同推广香港嘅旅游贸易，以及各方面嘅成就，揭尽香港小姐嘅使命，呢啲咁难忘嘅经验，作为香港一分子嘅我，可谓永志不忘。
  • 第20届香港小姐今晚就会诞生，我衷心祝贺佢嘅当选，同时对呢一切期待佢继续燃点选美文化，发扬热爱香港，关心社群嘅香港小姐传统精神，为提升香港喺国际嘅地位而努力。

1992年度冠军：卢淑仪

• 宣读日期：1993年06月06日，红磡香港体育馆
  • 自从响一年前当选成为九二年度嘅香港小姐之后，我就肩负起亲善大使嘅使命，负责系香港同埋世界各国宣扬香港，出席国际性嘅选美活动，呢一年可以算系我人生里面最丰盛、最难忘嘅一个阶段，今晚，九三年度嘅香港小姐即将诞生，我衷心咁祝福佢，同时，我亦都好希望佢能够好好咁把握未来呢一年，实践香港亲善大使嘅每一个任务，成为冲破局限，不再平凡嘅九三年度香港小姐。

1993年度冠军：莫可欣

• 宣读日期：1994年06月05日，红磡香港体育馆
  • 一年之前，我怀住兴奋莫名嘅心情当选为香港小姐，成为香港嘅亲善大使，代表香港到世界各地宣扬香港，协助推广香港嘅旅游同埋工商贸易，而系本港，我亦经常出席各项社会公益慈善活动，对香港揭尽本分，同时，我亦代表香港参加国际性嘅选美活动，例如国际华裔小姐选举，同埋啱啱系菲律宾举行过嘅环球小姐选举，参与呢啲活动，令我嘅眼界扩阔不少，而且仲学到好多人与人之间相处嘅心得，我要响度多谢一直爱护同埋支持我嘅好朋友，我要谨记住呢一份咁宝贵嘅友谊㗎，最后我祝福即将诞生嘅1994年度香港小姐，系未来嘅一年里面有更大嘅成就，将生命中嘅每一页都编写得更光辉同埋灿烂。

1994年度冠军：谭小环

• 宣读日期：1995年06月04日，红磡香港体育馆
  • 前方匆匆，眨下眼就系港姐决赛之夜，仲记得系旧年嘅今晚，戴上港姐后冠之后，我就开始履行香港小姐嘅任务，我曾经代表香港参加国际性比美活动，以及前往海外宣扬香港，同时，我亦经常参与电视嘅演出，对我嚟讲，过去系经历最难忘同埋充实嘅一年，籍呢个机会，我要衷心多谢各界比我嘅支持同埋爱护，新嘅一届香港小姐即将诞生，我诚挚祝福佢，继续发扬港姐服务社群嘅传统精神，为香港作出贡献。

1995年度冠军：杨婉仪

• 宣读日期：1996年06月02日，红磡香港体育馆
  • 响过去嘅一年，我履行咗香港小姐嘅任务，响海外同埋本地肩负起亲善大使嘅使命，同埋参与电视节目嘅演出，尤其荣幸可以主持百年国际体坛盛事，九六亚特兰大奥运节目，令我充实体验人生，邝阔视野，实在系获益良多，铭记心坎，今晚，新嘅香港小姐即将诞生，我衷心祝福佢继续发扬香港小姐嘅优良传统精神，响未来嘅一年，踏上灿烂星光大道，为香港带嚟更美好嘅明天。

1996年度冠军：李珊珊

• 宣读日期：1997年07月13日，红磡香港体育馆
  • 自从当选咗香港小姐之后，o响过去嘅一年，我嘅生活丰富咗好多，人生嘅体验亦充实咗。而且仲有机会参与电视节目嘅演出，呢段日子系我生命中最难忘嘅回忆，我会珍惜同感激大家对我嘅关怀同埋鼓励。
  • 新嘅一届香港小姐就快诞生，系香港回归后嘅第一位香港小姐，意义更加深远，我衷心祝福佢有璀璨嘅人生，同时为香港嘅安定繁荣共同努力，为社会带嚟美好嘅明天。

1997年度冠军：翁嘉穗

• 宣读日期：1998年06月06日，香港国际机场
  • 当选特区成立后嘅第一位香港小姐，我感觉相当自豪，响呢一年内，我参与好多社会公益嘅活动，仲有机会演出好多电视节目，同时亦曾经多次前往海外推广香港旅游同埋工商贸易，呢啲咁难忘所在嘅人生经验，将永远留系我美好嘅回忆。
  • 今届嘅香港小姐就快诞生啦，我衷心祝福佢，超越今日平凡，开展明日灿烂，拥有一个多姿多彩，光芒灿烂嘅人生，同时为香港带来美好嘅明天。

1998年度冠军：向海岚

• 宣读日期：1999年07月11日，红磡香港体育馆
  • 响当选香港小姐嘅一年里面，我嘅生命可谓超越平凡，呢段日子里面，响本地同埋海外参与咗好多社会公益活动，体验人生嘅意义，好多谢无线电视比机会我演出电视剧，以及主持特备节目，令我获益良多，而我最荣幸嘅就系代表香港推广旅游同埋贸易，更加令我感受到作为香港市民一分子，热爱香港，热爱社群嘅使命。
  • 今届香港小姐就快诞生，我衷心祝贺佢成为本世纪末嘅香港小姐，与香港共迎千禧，同创美好明天。

1999年度冠军：郭羡妮

• 宣读日期：2000年07月09日，红磡香港体育馆
  • 系我当选香港小姐之后，就展开咗我灿烂嘅人生，回顾过去一年，除咗能够参与唔同嘅亲善同公益活动，到世界各地去宣扬香港之外，仲有机会尝试到演艺工作，系各种大型歌舞节目中，就好似今晚香港小姐大型歌舞参与演出，系今年年初，我更加当选成为国际华裔小姐冠军，为我嘅人生写下光辉的一页，在我卸任嘅时刻，我衷心祝福新世纪第一位香港小姐，能够延续世纪传奇，和我一样有一个璀璨美丽嘅人生。

2000年度冠军：刘慧蕴

• 宣读日期：2001年07月15日，红磡香港体育馆
  • 系过去一年香港小姐任期里面，我嘅人生留下最美好嘅回忆，特别系担任咗2000年悉尼奥运大使，亲临现场报导呢个国际体坛盛事，同时有机会主持唔少电视节目同埋参与社会公益活动，使我嘅生命更充实更有意义，新嘅一任香港小姐即将诞生，系呢度我衷心祝颂佢系呢个二千零一夜创造神话，你想成真盛会中，继续延续香港小姐世纪传奇，开创更光辉璀璨人生。

2001年度冠军：杨思琦

• 宣读日期：2002年08月11日，红磡香港体育馆
  • 系过去嘅一年，我度过左一个丰盛嘅人生同埋最值得难忘嘅日子，自从当选香港小姐之后，我履行咗香港亲善大使呢个使命，除咗响海外协助推展香港旅游经贸之外，我仲参与咗好多本地嘅社会公益活动，同时，多谢TVB，比好多机会我，使到我能够参与幕前嘅演出，令我嘅人生更添姿彩。
  • 今日，香港人面对唔少考验同挑战，希望大家系困难嘅时刻能够积极进取，团结奋斗，冲破一切嘅患逆，迎接更美好嘅明天，到底，香港系我地嘅家，愿与全港市民共冕，三十年完美盛事，新世代港姐有你更添意义，新一届嘅香港小姐即将诞生，我响度衷心祝福佢，系未来嘅日子，继续发扬香港小姐热爱香港嘅精神，为香港作出更多嘅贡献。

2002年度冠军：林敏俐

• 宣读日期：2003年08月23日，红磡香港体育馆
  • 系过去嘅一年，我履行咗香港小姐嘅使命，并参与过好多唔同类型电视节目嘅演出．特别系有机会系任内演出电视剧，可以讲系我既丰收又难忘嘅一年，行刻卸任的我，好快趣就要返返去美国，继续我未完成嘅学业，心情当然系依依不舍，心系香港，仍然为港，我会继续系海外宣扬香港，希望将来学有所成，仲有机会为香港服务，临别依依，我感激香港所有嘅朋友，系过去一年嚟，比我嘅支持同埋鼓励，呢份真挚情意，深深印系我心底里永致不忘，香港，我会永远记住你，I Love Hong Kong Forever.
  • 新一届嘅香港小姐即将诞生，系呢度，我衷心祝福当选嘅佳丽，秉承香港小姐服务社群嘅优良传统精神，为迎众社会心民心，建设美好明天，作出贡献。

2003年度冠军：曹敏莉

• 宣读日期：2004年08月13日，将军澳电视广播城
  • 当选2003年度香港小姐，系我人生最荣幸同丰盛嘅一年，我不单止开始从事演艺工作，参与好多唔同类型嘅电视节目演出，仲出席本地同海内外嘅社会公益活动，使我生活体验更加充实，人生视野更加宽阔，我会好珍惜呢一年嚟难忘嘅岁月，系未来嘅日子努力做到最好，继续为香港服务。
  • 全球瞩目嘅雅典奥运即将揭幕，新一届接棒嘅香港小姐随即投入奥运揭幕嘅主持行列，本地同国际两大盛事连线接轨，意义非凡，我衷心祝福新诞生嘅香港小姐发扬更快、更远、更高，力争上游嘅奥运精神，为香港嘅福祉争取更美好嘅明天。

2004年度冠军：徐子珊

• 宣读日期：2005年08月20日，红磡香港体育馆
  • 成长系一个过程，回首当选香港小姐嘅一年，系人生中最享受；亦系获益良多嘅一个历程。无论系代表香港到外地交流，又或者响本地参与慈善工作，我都得到不少嘅启发。因此，我更积极去装备自己，以及去面对各种艰辛嘅挑战，希望香港小姐嘅形象能够为时下嘅年青人树立正面嘅榜样。卸任在即，对一年来鼓励、支持以及栽培我嘅朋友，我衷心铭感。我相信05年度嘅香港小姐会继续将香港友善、好客嘅精神带到世界各地之余，亦能够用爱去感染每一个香港人嘅心，我衷心祝福佢有一个美满、丰盛嘅成长过程。

2005年度冠军：叶翠翠

• 宣读日期：2006年08月12日，红磡香港体育馆
  • 当选香港小姐，系我过去一年以嚟，最开心同埋最满足嘅难忘事，系过往嘅一年，TVB安排我去到世界各地探访咗好多老人中心、孤儿院、智障学校，以及南亚海啸灾区等等，令我深受感动，获益良多，体会到世界上好多地方系好需要爱心同关怀。作为一位香港小姐，肩负起亲善大使使命之外，将香港人嘅爱心发扬光大，伸延至海外有需要帮助嘅地方，系热爱香港最好嘅具体行动。
  • 新一届香港小姐即将诞生啦，响呢度我要送上最衷心、最真诚的祝福，祝愿佢广受爱戴同支持，继续将香港人嘅善心、博爱精神嘅优良传统弘扬四海。

2006年度冠军：陈茵媺

• 宣读日期：2007年07月21日，红磡香港体育馆
  • （粤语口读）开心、自信心、决心同爱心，可以话系我当选香港小姐一年黎所经验嘅一啲心路历程，系任内，我有幸以港姐嘅身份代表香港到世界各地作亲善嘅访问，同埋慈善嘅活动，系短短唔够一年嘅里面，我经历咗好多，通过与世界各地人士嘅接触，令我嘅眼光扩阔咗，思想成熟咗，人生自然感到非常之充实，新一任港姐即将诞生啦，而我嘅人生又有一个新嘅起点，系度我衷心祝福今届嘅冠军，好似香港呢一颗东方明珠一样，经过十年回归嘅历练之后，仍然继续能够不断发光发亮，成为香港嘅骄傲。
  • （书面语）开心、自信心、决心和爱心，可以说是我当选香港小姐一年来所经验的一些心路历程，在任内，我有幸以香港小姐的身份代表香港到世界各地作亲善访问和慈善活动，在短短不够一年里面，我经历了很多，通过与世界各地人士的接触，令我的眼光扩阔咗，思想都成熟了，生活自然感到非常之充实，新一任港姐即将诞生啦，而我的人生又有一个新起点，在这里我衷心祝福今届的冠军，好像香港这颗东方明珠一样，经过十年回归的历练之后，仍然继续能够不断发光发亮，成为香港的骄傲。

2007年度冠军：张嘉儿

• 宣读日期：2008年07月19日，香港会议展览中心
  • 系过去嘅一年，对我黎讲充满咗满足感同埋挑战，履行香港小姐嘅责任之外，TVB仲俾咗好多珍贵嘅机会比我去探索世界，认识社群，今年我有机会参加好多慈善亲善活动，深深感觉香港小姐对社区可以作出更多项奉献，其中，令我最难忘嘅事，就系应香港贸易发展局去到莫斯科推广香港设计既产品，为香港争取更多商机同埋商誉，受到大会既赞许，另外，我亦都应香港旅游发展局安排去到日本交流推广，最近我亦都去咗郑州探访失明同埋贫困嘅同胞，帮助筹款改善佢地嘅生活，呢啲唔单止令我增广见闻，更加增强咗个人自信心啊。
  • 我呢一年成长咗好多，我好感谢家人、朋友嘅支持同埋关心，我亦都特别感谢TVB既栽培，我会继续努力工作，实践去年参选港姐既志愿，协助向市民宣传健康生活及食品安全嘅知识，延续香港小姐既使命。

2008年度冠军：张舒雅

• 决赛日期：2009年08月22日，地点：红磡香港体育馆
  • 鉴于2008年度冠军张舒雅没有履行香港小姐的职责而被无线电视雪藏及禁止为2009年度冠军刘倩婷主持加冕仪式，所以并没有发表卸任感言以及令2009年度香港小姐竞选变成没有上届冠军加冕的选美盛事，2009年度冠军刘倩婷则由1977年香港小姐冠军暨慧妍雅集永远名誉会长朱玲玲小姐为其加冕，并在加冕前发表一段语重心长的感言：希望新一届香港小姐可以参与国内及国际活动，推广香港的优点，亦希望冠军佳丽能以香港小姐的名衔多做善事工作，并祝福获选佳丽冠军名衔能为其带来快乐以及在未来一年可以好好充实自己，而亚军及季军则由2008年度亚军陈倩扬及季军马赛为其颁奖。

2009年度冠军：刘倩婷

• 宣读日期：2010年08月01日，红磡香港体育馆
  • 获选为香港小姐冠军系我人生嘅转捩点，过去一年系我人生最充实嘅一年，我代表香港去到南非参加世界小姐竞选，我亦去到世界各地进行亲善访问，宣传香港，今晚我将会完成香港小姐嘅职责，以后我会坚持香港小姐嘅精神，继续为社会作出贡献，以我最热爱嘅演艺，歌唱同舞蹈带比大家欢乐，最后我非常多谢TVB比我嘅机会同栽培，亦多谢我家人同朋友比我嘅支持同鼓励，我会继续努力。

2010年度冠军：陈庭欣

• 宣读日期：2011年08月07日，将军澳电视广播城
  • 一段有意义嘅人生，离唔开不断学习、进步同埋成长，回望充实嘅2010年，我扩阔咗视野，心灵变得更加富有，我履行左亲善大使嘅使命，参与左好多慈善活动，将香港人嘅爱心传扬开去，我非常珍惜同享受每一个工作机会，包括担任司仪同埋主持，令我嘅人生加添色彩，忠心感谢TVB悉心嘅栽培，同时感谢我家人同朋友对我嘅支持同鼓励，时间如流沙，系呢度我要对新一届香港小姐献上最真至嘅祝福，祝福佢系未来嘅日子会深受大家嘅爱戴，揾到自己嘅梦想，延续亲善嘅精神，并将香港人积极行善同埋拼搏精神带到世界每一个角落。

2011年度冠军：朱晨丽

• 宣读日期：2012年08月26日，将军澳电视广播城
  • 台上一分钟，台下十年功，每一位成功人士嘅背后都付出咗汗水同努力，除咗不断学习，仲要不断进步，而我一直都系度奋斗，回望过去丰富嘅一年，除咗担任司仪同拍剧，我亦都履行慈善嘅重任，尽力帮助有需要嘅人，为社会出一分力。多谢TVB提供一个平台，去完成我嘅使命同梦想，亦都多谢一路以黎支持我嘅亲人同朋友，我会继续努力，令自己嘅人生写下灿烂嘅一页。时光飞逝，系呢度，我亦系度鼓励新一届嘅香港小姐，继续努力，将爱宣扬落去。深深祝福佢地有一个美好嘅未来，继续向自己嘅梦想进发，将爱传送到世界每一个角落，为香港小姐继承光辉嘅一页。

2012年度冠军：张名雅

• 宣读日期：2013年09月01日，将军澳电视广播城
  • 每一个成功人士，都会付出努力同奋斗，而我会继续为自己嘅理想，不断学习同进步，系呢一年里面，我参与左好多慈善公益活动，帮助有需要嘅人，将爱心同关怀带到每一个角落，每一项工作对我黎讲，都系新嘅尝试同挑战，感激TVB为我安排唔同类型嘅表演，拍摄工作同埋担任司仪，为我嘅人生添上悦目色彩，写下光辉同美丽嘅一页，亦都多谢爱护、支持我嘅屋企人同朋友，系呢度我祝福新一届嘅香港小姐达成自己嘅梦想，继续履行香港小姐嘅精神，将爱心宣扬开去。

2013年度冠军：陈凯琳

• 宣读日期：2014年08月31日，将军澳电视广播城
  • 光阴如流水，转眼已经当选咗香港小姐一年啦！回顾过去一年嘅日子，工作过得非常之充实同埋有意义，除咗传承及履行香港小姐嘅责任之外，重增长咗唔少嘅见闻，同埋认识咗好多新朋友，借着今晚我想再一次多谢一直支持同鼓励我嘅父母、前辈、朋友，同埋有分选我出嚟嘅你，更加要多谢公司对我嘅栽培同照顾，希望新一届嘅香港小姐继续传承及履行香港小姐嘅责任，再次写下光辉嘅一页。

2014年度冠军：邵佩诗

• 宣读日期：2015年08月30日，将军澳电视广播城
  • 时光飞逝，当选咗香港小姐转眼已经一年喇！回顾过去一年嘅日子，丰富咗我嘅见识，扩阔咗我嘅视野，所有工作亦都非常之有意义。我好珍惜同感恩有呢个机会，好开心呢啲经验令我过得好充实，喺呢度我希望新一届嘅香港小姐能够传承同履行香港小姐嘅责任，最后我藉住呢个机会要多谢我嘅家人、朋友、同支持我嘅人。更加要感激公司嘅栽培，令我由一粒细小嘅种子，变成可以彩放美丽嘅花朵。

2015年度冠军：麦明诗

• 宣读日期：2016年09月11日，将军澳电视广播城
  • （粤语口读）一年前嘅今日，我喺哩度讲过要“贤良淑德”，今日想加多一句：要“始终如一”。呢一年，港姐俾咗我好多千载难逢嘅机会，但同时俾我面对好多选择同挑战。系一个精彩嘅旅途，但都系一个磨练，磨练出贤明、良知、淑善同品德。呢啲经历亦都鼓励我要学习坚定，唔好为别人忘掉自己，唔好被困难所折服；要毋忘初衷，一如既往。喺呢度想衷心多谢大家，系每一个嘅您，俾我可以企喺哩个舞台上面成长，亦都祝愿下一届嘅香港小姐，能够薪火相传、青出于蓝。
  • （书面语）一年前的今天，我在这里说过要“贤良淑德”，今天想加多一句：要“始终如一”。 这一年，港姐给了我好多千载难逢的机会，但同时让我面对很多选择和挑战。是一个精彩的旅途，但都是一个磨练，磨练出贤明、良知、淑善和品德。这些经历亦鼓励我要学习坚定，不要为别人忘掉自己，不要被困难所折服；要毋忘初衷，要一如既往。我想衷心多谢大家，是每一个的您，让我可以站在这个舞台上成长，亦祝愿下一届的香港小姐，能够薪火相传、青出于蓝。

2016年度冠军：冯盈盈

• 宣读日期：2017年09月03日，将军澳电视广播城
  • 踏上同一个舞台，今日我嘅身份已经唔同，喺过去呢一年，好感恩香港小姐让我梦想成真，带我踏上意想不到嘅精彩旅程，同时带俾我磨练同成长嘅机会。
  • 每个人对美都有唔同嘅定义，我曾经希望可以争取到所有人嘅认同，系香港小姐令我明白：只有学识欣赏同忠于自己，先可以流露出最自然、自信嘅美。
  • 喺往后嘅日子，我期望自己可以保持真我，真挚待人，即使面对逆境亦绝不低头，迎难而上，喺度我祝愿新一届嘅香港小姐可以活出真我，闪耀出独一无二嘅光芒，做最真实嘅自己，成为自己人生嘅赢家。

2017年度冠军：雷庄𠒇

• 宣读日期：2018年08月26日，将军澳电视广播城
  • 系过去一年对于我黎讲，好值得纪念，我好多谢我嘅屋企人，朋友，同埋支持我嘅fans，我感恩，我经历咗好多，学咗好多嘢，而且系呢个过程里面，我认识咗我生命中最好嘅朋友，而家系我开始新生活嘅时候，我都会记得呢个咁精彩嘅旅程，系呢一度，我祝愿新一届香港小姐，可以发放更多正能量，令大家变得更加积极同自信。

2018年度冠军：陈晓华

• 宣读日期：2019年09月08日，将军澳电视广播城
  • 我好感激一年前嘅自己，参选咗香港小姐，亦都非常多谢系呢一年教过我嘅咁多位前辈，呢一年系充满住挑战同新事物，有时候，我都会好在意周围嘅目光同评价，但系咁样，反而会令到自己变得好沉重，所以呢一年，慢慢就学识聆听自己内心嘅声音，比起只系满足其他人嘅期望更加重要，喺未来嘅日子，我希望继续喺大家面前以轻盈嘅姿态去表演自己，系呢度，亦都祝愿各位候选佳丽，喺将来嘅日子，继续发光发亮。

2019年度冠军：黄嘉雯

• 宣读日期：2020年08月30日，将军澳电视广播城
  • 好多谢一年前嘅自己，勇敢踏上港姐呢个华丽舞台，令我嘅人生不断进步、成长，同时话比自己知梦想从来唔系一个遥不可及嘅梦。梦，经过坚持同努力，最终都可以会成真，人生就好似一场接力赛，一场比赛嘅落幕，亦都代表另一场比赛嘅开始，回顾初衷，大家都向紧同一个目标进发，有人会行得快啲，有人又会行得慢啲，但我深信只要唔放弃，永不停步，最终大家都可以喺同一个终点相遇，最后，我衷心祝愿下一届香港小姐，接好代表香港呢一支接力棒，跑出璀璨亮丽嘅人生。

2020年度冠军：谢嘉怡

• 宣读日期：2021年09月12日，将军澳电视广播城
  • 系过去一年，我好似坐过山车一样，一夜之间由苏格兰既护士变成香港小姐。呢一年，我人生好精彩，每日不断有学习，挑战，同埋进步既机会。吾知大家觉得我d广东话有无叻左呢？我自己觉得麻麻地。不过多谢大家接受我，令我吾使重复用英文讲多一次。多谢晒TVB俾我有机会做慈善活动，仲成为爱回家既一分子。我真系好享受呢一年既每一分钟，亦都期待黎紧既日子继续代表香港好好表现自己。最后，我祝愿下一届香港小姐keep住积极同自信，发放更多正能量。 Always remember，行多一步，to follow your dreams。

2021年度冠军：宋宛颖

• 宣读日期：2022年09月25日，红磡香港体育馆
  • 熟悉既音乐，不变既造梦舞台，感觉一切好似寻日发生一样。系过去既一年，我觉得自己好幸运，因为香港小姐呢个梦想舞台，将我带去更大更广阔既世界，令我揾到属于自己真正既舞台。香港小姐亦都令我明白女性既美唔限于外在，内外兼并，用爱证明生命既美丽，将爱散发到世界每一个角落。卸任在即，但我必定会带住香港小姐既精神继续将爱宣扬，将美丽绽放。今晚台上每一位勇敢既香港小姐即将展开一趟未知之旅，但系呢一种未知就系生命最美丽既地方。系呢度，衷心下一届香港小姐能够带住呢一份冲劲，善良同爱心继续走出属于自己既美丽之路。

2022年度冠军：林钰洧

• 宣读日期：2023年08月27日，将军澳电视广播城
  • 时光飞逝，转眼间一年就过去啦，感觉寻日先至啱啱喺呢一个舞台上加冕。回望过去一年，参加过唔同既公益活动，令我增广见闻，亦都接受过唔同既挑战，令我更加坚强，更加相信自己。喺呢度，我非常感恩过去一年认识到既每一位，令我感到人生充满着温暖，即使卸任之后，我都一定将人间俾我既善良回馈社会，帮助更加多有需要既人。希望新一届香港小姐美丽地活出自己精彩人生，秉承香港小姐精神，带着一颗善良既心贡献社会。